Makaronun ən məşhur növləri

Marketlərdə makaronun növləri o qədər çoxdur ki, adam seçim etməkdə çətinlik çəkir. Biz sizə makaronun növləri haqqında qısa məlumatı təqdim edirik və bu məlumatın köməyi ilə siz münasib makaronu seçə bilərsiniz.

Şübhə yoxdur ki, spagetti makaronun dünyada ən geniş yayılmış növüdür. Bu uzun və kövrək makaron çox vaxt əsas yeməklərdə istifadə olunur. Müxtəlif pomidor və ət sousları onu daha da dadlı edir.

Farfalle - Farfalle italyan dilindən tərcümədə “kəpənək” deməkdir və bu növ makaron məhz kəpənək formasındadır. Kəpənək makaronu hər növ sous və yüngül salatlarla gözəl vəhdət təşkil edir və eyni zamanda boşqabda cəlbedici görünür.

Kalamari - Bu makaron növünün forması su heyvanı olan kalmara çox bənzəyir. O, süfrəyə adətən tərəvəz, sous və balıqla birgə qoyulur.

Lazanya makaron növünün ölçüsü digər növlərə nisbətən daha iridir. O, nazik hamarlanmış xəmirin yastı, düzbucaqlı parçasıdır. Bu makaron bir qayda olaraq bir neçə dilimdən hazırlanır və hər dilimin arasına ət və tərəvəz kimi içliklər əlavə olunaraq bişirilir.

Kanneloni qalın, diametri 1.5-2sm olan içi boş borucuqdan ibarət makaron növüdür. Pendir, ispanaq və ya ət içliyi ilə pomidor sousu əlavə edilərək sobada bişirilir və əla dad verir.

Penne makaronun dünyaca məşhur digər bir növüdür. Penne italyan dilindən tərcümədə “qələm” deməkdir. O, adətən maili şəkildə kəsilmiş borucuqlardan ibarət olur. Penne zapekanka və salatlarda ən çox istifadə edilən makaron növüdür.